Uruhare rwa Hollywood mu kumenyekanisha sinema Nyarwanda

Ahagana mu myaka ya 2000, filime nyarwanda ndetse na filime ku Rwanda zubakiye ku nsanganyamatsiko ya jenoside yakorewe Abatutsi zatangiye kwigaragaza ku bwinshi, harimo by’umwihariko iz’umwibariro zakozwe na Hollywood.

Mu nkuru zacu zatambutse twabagejejeho amwe mu mateka yaranze sinema nyarwada kuva ku mwaduko w’abazungu mu Rwanda, igihe cya repubulika ya mbere ndetse n’iya kabiri,ndetse tubagezaho n’amwe mu mateka ya sinema kugeza muri 2000.

Tugiye gukomeza tubagezaho amateka ya Sinema Nyarwanda nyuma y’umwaka wa 2000, turebera hamwe uko filime nyarwanda ndetse na filime ku Rwanda zubakiye ku nsanganyamatsiko ya jenoside yakorewe Abatutsi zatangiye kwigaragaza ku bwinshi.

Turifashisha igitabo cya Mwarimu Jean Claude Uwiringiyimana, yise Sinema, aho agaruka kuri bimwe mu byaranze amateka ya sinema nyarwanda.

Mu birebana na filime mpamo, Umunyarwanda wamenyekanye muri iyo myaka ubwo Tereviziyo y’u Rwanda yongeraga gutangira gukora ni Mugyema Landouard, wari ushinzwe ishami ryo gukora ibiganiro kuri Tereviziyo Rwanda, akaba yarakoze filime mpamo zinyuranye ku ntambara yo kwibohora.

N’ubwo filime ze zitageze ku rwego mpuzamahanga yagize uruhare rugaragara muri icyo gihe ndetse aza no kumenyekana muri filime mpamo yakorewe IBUKA mu wa 2001 akaba yarayise "Rwanda: The Preventable Genocide".

Mu mwaka wa 2000, Umunyakameruni François Woukouache wigishaga isomo rya sinema mu ishami ry’Itangazamakuru muri Kaminuza Nkuru y’u Rwanda yari yakoze filime mpamo ndende (126 min), "Nous ne sommes plus morts" yubakiye ku buhamya bw’abarokotse jenoside yakorewe Abatutsi.

Ni muri iyo myaka ya 2000, filime nyarwanda ndetse na filime ku Rwanda zubakiye ku nsanganyamatsiko ya jenoside yakorewe Abatutsi zatangiye kwigaragaza ku bwinshi, harimo by’umwihariko iz’umwibariro zakozwe na Hollywood.

Nk’uko twabivuze, abanyamakuru b’abanyamahanga bagize uruhare rugaragara mu gukora filime ku Rwanda nyuma ya 1994 kugeza mu w’1999 kandi zose zikaba zari filime mpamo.

Umunyamakuru w’Umwongereza Nick Hugues, akaba yari azwi ku mwuga wo gufata amashusho akorera televiziyo za BBC, CNN na NBC yaje guhura n’Umunyarwanda Eric Kabera wari umaze iminsi ashinze kampani yitwa Link Media Productions, bumvikana gukora filime y’umwibariro kuri jenoside.

Iyo filime yiswe 100 Days yakozwe na Nick Hugues (dore ko ari na we uyitirirwa nk’umuyobozi wayo) n’Umunyarwanda Eric Kabera wagizemo uruhare rugaragara mu kuyikora (Co-Producer) ndetse Abanyarwanda bakayikinamo ku bwinshi.

By’umwihariko ikaba ari filime ndende y’umwibariro yakozwe bwa mbere kuri jenoside yakorewe Abatutsi, ikaba yari ikinnye mu rurimi rw’Icyongereza. Iyi firime 100 Days yasohotse mu w’2001 ari na bwo Eric Kabera yashingaga Rwanda Cinema Center.

100 Days niyo filime ya mbere y’umwibariro (feature film) ivuga ku Rwanda yakozwe nyuma ya Jenoside yakorewe abatutsi.

Hagati y’umwaka w’2000 n’2007 filime zakorwaga n’abanyamahanga zariyongereye, by’umwihariko iz’umwibariro zakozwe ku ngengo y’imari ihagije.

Firime mpamo ku Rwanda zayobowe n’abanyamahanga muri icyo gihe twavuga nka filime "Umurage (2002)" yakozwe na Gorka Gamarra, "Shake Hands with the Devil: The Journey of Romeo Dallaire (2004)" ya Peter Raymont, "Ghosts of Rwanda (2005)" yakozwe na PBS ndetse n’izindi.

Muri icyo gihe kandi, abanyamahanga bakoze filime z’umwibariro ku Rwanda, cyane cyane hagati y’2004 n’2007 aho buri mwaka hasohokaga nibura filime imwe.

Filime ndende z’umwibariro zigera kuri esheshatu (6) zikaba zarakozwe muri iyo myaka itatu ndetse zose zikundwa ku isoko mpuzamahanga, yewe hafi ya zose zitoranywa mu maserukiramuco mpuzamahanga ya firime.

Izo filime zikaba ari Hotel Rwanda (2004) ya George Terry, Shooting Dogs (2005) ya Michael Caton -Jones, Sometimes in April (2005) ya Raoul Peck, Un Dimanche à Kigali ya Robert Favreau, Shake Hands with the Devil (2007) ya Roger Spottiswoode, Munyurangabo ya Lee Isaac Chung na Opération Turquoise (2007) ya Alain Tasma, n’izindi.

Iyi myaka uko ari 4 tukaba tuyifata nkaho ari ingenzi mu gukangura Abanyarwanda benshi gutinyuka gukora filime z’umwibariro, dore ko bamwe muri bo bahabwagamo akazi k’igihe gito bityo bakigiraho uko filime zikorwa.

Mu w’2007, akaba ari bwo izi firime tubona ku masoko zatangiye gukorwa (zibanjirijwe na filime Ikigeragezo cy’Ubuzima I) Willy Ndahiro (Paul) na Daniel Gaga (Ngenzi) nibo bakinnyi ba filime ba mbere mu Rwanda bakinnye muri filime ya mbere yakozwe n’abanyarwanda igurishwa ku isoko rya filime mu Rwanda ariyo Ikigeragezo cy’ubuzima.

Mu nkuru zacu zitaha, tuzabagezaho bimwe mu byaranze sinema nyarwanda nyuma y’umwaka wa 2007 birimo ikendera rya filime ku Rwanda ziyobowe n’abanyamahanga, kwigaragaza kw’impano shya nyarwanda ku rwego mpuzamahanga ndetse n’itangira ry’uruganda rwa filime nyarwanda.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO