Urutonde rw’ibyamamare 10 byahoze bikora akazi gasuzuguritse

Benshi mu byamamare tubona bikunzwe dutekereza ko bitigeze bikora akazi benshi bita ko gasuzuguritse mbere y’uko bamamara.

Muri iyi nkuru tugiye kwibanda ku byamamare 10 bikunzwe ku rwego rw’isi aho mbere yo kuba ibyamamare byakoze akazi gasuzuguritse ku buryo hari n’abakoze akazi ko koza ibyombo abandi bagakora muri resitora n’indi mirimo itandukanye benshi bafata nk’aho isuzuguritse ku buryo icyamamare runaka cyitayikora.

1. Dwayne Johnson (The Rock)

Dwayne Johnson ni umukinnyi wa filime ukunzwe cyane mu ruganda rwa sinema ku rwego rw’isi aho azwi cyane ku izina rya The Rock.

Mbere yo kwamamara mu mukino wo gukirana n’iteramakofi wa WWE, uyu mugabo w’imyaka 49 mbere yo kuba icyamamare yahoze yoza ibyombo.

Rimwe yigeze kwandika ku rukuta rwe rwa twitter ati ‘’ Amafaranga ya mbere nakoreye yavuye mu koza ibyombo ubwo nari mfite imyaka 13, icyo gihe nakoraga kuva saa cyenda (15:00) z’umugoroba nkageza saa tanu n’iminota mirongo itatu (23:30) z’ijoro’’.


The Rock yozaga ibyombo mbere yo kuba icyamamare.

2. Beyoncé

Mbere yo kuba icyamamare muri muzika, Mu kiganiro Beyoncé yagiranye na Essence mu 2011 yatangaje ko hagati y’imyaka itandatu (6) n’icyenda (9) yafashaga nyina umubyara akazi ko mu nzu zitunganya imisatsi (hair salon).

Beyoncé yatangaje ko icyo gihe yamufashaga gusukura imisatsi yabaga yatakaye hasi cyangwa agafasha abantu bifuza kurambura no kuzinga imisatsi yabo aho yabikoraga anabaririmbira.


Beyoncé yakoraga muri salon itunganya imisatsi mbere yo kuba icyamamare.

3. Jay-Z

Mbere yo kuba icyamamare mu njyana ya Hip-Hop, Jay-Z yakoraga ubucuruzi bw’ibiyobyabwenge ku mihanda.

Mu kiganiro uyu mugabo yagiranye na ’Vanity Fair’ yagize ati ’’Nari umucuruzi w’ibiyobyabwenge, kugirango ube mu bucuruzi bw’ibiyobyabwenge, uba ukeneye kumenya icyo ugomba gushora n’icyo ukeneye kuba wakora kugirango wongere kwisuganya igihe ubucuruzi bw’ibiyobyabwenge butagenda neza’’

’’Kuba wafungura nk’inzu zitunganya imisatsi y’abagabo cyangwa ugafungura ikinamba cy’imodoka, ubwo nibwo bwari ubucuruzi icyo gihe twakoraga kugirango twikure mu gucuruza ibiyobyabwenge.’’

’’Icyo gihe wagombaga gushakisha ibintu bigomba kugukura muri ubwo buzima bw’ibiyobyabwenge kuberako iteka ryose ubuzima bwawe bwabaga buri mu kaga. Byasaga nk’aho ufungiranye mu cyumba gifite idirishya rifunganye’’

’’Byabaga bisobanuye ko ugiye gufungwa ubuziraherezo cyangwa ugapfa.’’


Jay-Z yacuruzaga ibiyobyabwenge mbere yo kuba icyamamare.

4. Barack Obama

Barack Hussein Obama yabaye perezida wa 44 wa Leta zunze ubumwe za Amerika.
mbere yo kwinjira muri politike ngo abe icyamamare yabanje gukora akazi gasanzwe gaciriritse cyane.

Barack Obama yabaye umukozi wa ’Baskin Robbins’, uru ni uruganda rwamamaye mu gutunganya ibyo kurya biryohera (ice cream) ndetse umwe mu bahoze ari abakozi barwo harimo na perezida Barack Obama.


Barack Obama yakoraga mu ruganda rukora ice cream mbere yo kuba icyamamare.

5. Brad Pitt

Uyu mugabo w’imyaka 57 ni icyamamare mu ruganda rwa sinema ku rwego rw’isi, gusa ibi siko byahoze.

Uyu mugabo mbere yo kuba icyamamare muri sinema yahoze akora akazi ko kwambara umwenda wishusho y’inkoko aho yakanguriraga abantu kuza kugura inkoko muri El Pollo Loco i Los Angeles.


Brad Pitt yakoreraga iduka ricuruza inkoko mbere yo kuba icyamamare.

6. Rihanna

Uyu muririmbyikazi wamenyekanye cyane mu ndirimbo zitandukanye nka ’’Diamonds, Umbrella’’ niwe muntu kuri uru rutonde wakoze akazi gatandukanye n’ibindi byamamare uri busange kuri uru rutonde.

Mu gihe bamwe bogeje ibyombo abandi bagakora muri za resitora no mu nzu zitunganya imisatsi, Rihanna we yabaye umutoza w’abasirikare.

Rihanna yatozaga abasirikare babarizwa mu cyiciro cya Cadet bo mu birwa bya Barbados dore ko ari naho akomoka.

Mu kiganiro Shontelle yagiranye na BBC, uyu akaba ari umuririmbyi wo muri Barbados ndetse akaba yarafatanyaga na Rihanna gutoza abasirikare bashya, yagize ati ’’Nitwe twatozaga abasirikare ba Cadet, twabakoreshaga imyitozo ikarishye cyane nk’iyo bazaga batinze’’.


Rihanna yari umutoza w’abasirikare ba cadet bo muri Barbados mbere yo kuba icyamamare.

7. Kanye West

Uyu mugabo w’imyaka 44 ni icyamamare mu njyana ya Hip-Hop, akaba umuririmbyi mwiza, akaba umwanditsi w’indirimbo, agatunganya indirimbo, akaba umushoramari ndetse akaba anatunganya imideli.

Mbere yo gukora iyo mirimo yose itandukanye yatumye aba icyamamare ku rwego rw’isi, uyu mugabo yahoze ari umukozi w’uruganda rwa GAP.

Uru ni uruganda rukora rukanatunganya imyambaro itandukanye rwashinzwe mu mwaka wa 1969, uru ruganda rumenyerewe cyane mu gutunganya imyenda itandukanye yanditseho GAP.

Mu kiganiro yagiranye na Paper Magazine, Kanye West yaravuze ati ’’Birasekeje ukuntu natangiye gukorana na GAP niga mu mashuri yisumbuye, bisa nk’aho mu myaka 15 ishize ariho hantu nakuye ubumenyi bwo guhanga udushya .’’


Kanye West ubu ni umwe mu batunganya imideli ndetse avuga ko ubumenyi bwo gutunganya no guhanga udushya mu mideli abikomora ku kuba yarigeze kuba umukozi w’uruganda rwa GAP mbere yo kuba icyamamare tuzi uyu munsi.

8. Nicki Minaj

Mbere yo kuba icyamamare mu njyana ya Hip Hop, uyu mugore w’imyaka 38 yahoze akora mu ishami rimwe rya resitora zigurisha ibikomoka mu nyanja izwi cyane ku izina rya ’Red Lobster seafood restaurant’ aho yakoraga akazi ko kwita ku bakiriya ari umuseriveri (waiter).

Mu kiganiro yagiranye na Billboard, mu magambo ye Nicki Minaj yaravuze ati ’’ Nakoraga muri Red Lobster mbere y’uko nirukankana umukiriya hanze ya resitora nkamutunga urutoki rwa musumbazose mutegeka ko angarurira ikaramu yanjye .’’

’’ Ni ukuri kw’Imana nari mubi cyane.’’


Nicki Minaj yakoraga muri resitora mbere yo kuba icyamamare.

9. Harry Styles

Amakuru dukesha Daily Mail avuga ko Harry Styles wahoze ari mu itsinda rya One direction yahoze akora akazi ko guponda no gutunganya amafunguro akoreshwa ifarini.

Mu mwaka wa 2013, yaje gukubitwa urushyi igihe yari ari gutanga umugati ku mukiriya muri Mandeville bakery aho yahoze akora gusa icyo gihe yari mu bikorwa byo gufata amashusho ya filime This Is Us.

Uwahoze ari umukoresha we yagize ati ’’ Niwe mukozi wa mbere wagiraga ikinyabupfura kandi akubaha kurusha abandi bakozi bose twagize, ndetse abakiriya baramukundaga cyane.’’


Harry Styles yakoraga mu iduka ricuruza imigati n’ibikomoka ku ifarini mbere yo kwamamara.

10. Jon Hamm

Jonathan Daniel Hamm ni icyamamare mu gukina filime ndetse akanatunganya filime aho yamenyekanye cyane nka Don Draper mu ruhererekane rwa filime yiswe Mad Men.

Mbere yo kuba icyamamare muri sinema, uyu mugabo niwe muntu wakoraga akazi kagoye kandi kabangamye nk’uko yabyivugiye mu magambo ye.

Mu kiganiro yagiranye na Vanity Fair yaravuze ati ’’ Icyo gihe nakoraga nk’utunganya aho gukinira filime z’abakuru (porno) zakorwaga na Cinemax.’’

’’ Byanshenguraga umutima .’’


Jon Hamm yakoraga akazi ko gutunganya aho bakiniraga filime benshi bita iz’urukozasoni mbere yo kuba icyamamare.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO