Utaraza i KIGALI wumvaga ari hantu ki?

Kigali ni Umurwa mukuru w’u Rwanda. Ibarura riheruka, ryagaragazaga ko mu mwaka wa 2020 izaba ituwe n’abaturage bagera kuri miliyoni imwe n’ibihumbi ijana na mirongo itatu na bibiri 1.132.000.

Ifite uturere 3 turimo , Kicukiro, Gasabo na Nyarugenge. Utu turere twose ubu tubarizwa mu mujyi wa Kigali. Benshi mu batuye mu mujyi wa Kigali, hari abagiye baza bava mu zindi ntara si bakavukire.

Urugendo rwa X aza i KIGALI..

Kera najyaga numva umuntu wese uba i Kigali ari umuntu utinyitse. Numvaga ko buri muturage afite imodoka agendamo n’inzu ye, mbese ari ahandi hantu.

Iwacu mu cyaro kubona imodoka byabaga ari nk’umunsi mukuru kubera ko nta zahazaga n’iyaje izanye umuntu uvuye i Kigali abantu bose bakaza kuyikorakora ngo barebe icyo aricyo. Naje gufata urugendo ndaza nta muntu n’umwe mpazi. Icyo nari nzi ni uko hari ahantu numvaga bavuga ko hitwa Nyabugogo.

Inzira yose naje nibutsa shoferi ko ngiye Nyabugogo. Abantu bari muri iyo modoka bamwe bakaryana inzara bitewe n’aho mbivugiye n’umwanya usigaye ngo tuhagere.

Twaje kuhagera bigeze mu ma saa kenda z’umugoroba (15h00). Icyo nakoze narwaye muzunga kubera kureba buri modoka yose inciyeho.

Uko natangiye urugendo rw’ubuzima i Kigali

Muri ayo masaha twahagereye nta muntu n’umwe nje kureba cyangwa se ngo hari n’uwo mpazi uturuka mu cyaro aho navaga, byambanye ihurizo rikomeye.

Ijoro ryarageze mfata imyenda itatu nari mfite mu ishashi nyisasa i ruhande rwa sitasiyo ndaryama. Mu mufuko nari mfite amafaranga ibihumbi bibiri (2000 frw) gusa.

Bwarakeye noga mu maso hafi aho hari robine, nkimara koga mu maso haje umugabo arambaza ko ndashaka akazi ko mu rugo?
Navuze ko nkashaka nihuse. Ariko nta kintu na kimwe narinzi cyo guteka cyane ko nari menyereye gutogosa ibijumba hejuru y’ibishyimbo tukirira.

Yaranjyanye angeza mu rugo bahita banyereka icyumba cy’umukozi, aho batekera, aho bashyira amasafuriya n’ibindi. Ambwira ko azajya ampemba igihumbi na Magana atanu (1500 frw).

Kubera ko ntarinzi guteka, natangiye gushaka uburyo bwose nakwiha akandi kazi gakomeye kuruta kwerekana ko nabuze ibyo nkora. Narazindukaga nkakata ibiti biri ku rugo, nkakata ibyatsi, mbese akazi kagoye. Icyo gihe umugore wa boss nta kazi yari afite yabyukaga asanga nkiri mu bindi nawe akajya mu gikoni guteka.

Boss yaje gusanga nkora akandi kazi katari ako yanzaniye, noneho ambwira ko aribyo nshoboye kandi ko abona mbikora neza. Ahita anshyira ku bihumbi bine ku kwezi (4000 frw). Nakoze ako kazi amezi atandatu, ntangira kumenyena n’abantu duturanye, ntangira koga no kwambara neza.

Hari umugabo twari duturanye watwaraga moto Motar, atangira kujya anyigisha uburyo bayatsa n’uburyo uyihagurutsa ikagenda. Ku bwanjye nubwo ntacyo namubwiraga ariko nabonaga ari nk’ibitangaza birimo kumbaho.

Mu gihe gito natangiye kumenya kuyitwara kubera ko uko yatahaga yahitaga ampamagara nkagenda akanyigisha.

Bidatinze naje gusezera boss kubera ko nari maze kumenyana n’abantu benshi hari n’abashaka kumpa moto ngo njye nyitwara. Ariko Boss arabyanga ambwira ko nguma mu kazi akampa ibihumbi icumi ku kwezi (10.000 frw).

Nakomeje akazi mpaba imyaka itatu. Bigeze aho niwe wambwiye ko maze gukura agomba kunshakira ibindi byo gukora byanteza imbere. Yahise anshakira akazi ko mu kabari ku mafaranga ibihumbi makumyabiri (20.000 frw).

Bampaye akazi ko kujya njya kurangura inzoga. Ariko nirinze gukora ibyo banzaniye ahubwo nkakora akazi kose. Ibyo nabonaga byapfuye narabikoraga ntitaye ku wagombaga kubikora.

Byaje gutuma abantu bose bazaga muri ako kabari bankunda ku buryo iyo basangaga ntahari bamwe banafataga icyemezo bagashaka ahandi bajya kunywera ayabo.

Umugabo umwe yaraje ambaza ko nasoje amashuri yanjye. Mubwiza ukuri ko ntize ariko atari ukubera ubushobozi bwabuze ahubwo ko ari njye wumvaga ntabyo nshaka.

Yambwiye ko naza akampa moto ye, noneho nkajya mwishyura ibihumbi cumi na bitanu (15000 frw) mu cyumweru. Nasezeye mu kabari ntangira gutwara moto mu muhanda.

Mu cyumweru hari ubwo nakoreraga ibihumbi mirongo itatu na bitanu (35000 frw). Nakuramo aye nkasigara menshi ku murusha!!

Byaje kugera ubwo nanjye nigurira moto yanjye ntangira kwikorera aho kuba hari uwo ngomba guha amafaranga navunikiye. Ubuzima bwanjye mbutangira ntyo. Naje gushaka umugore, tubyarana abana babiri ubu bose barimo kwiga bagiye gusoza amashuri yabo.

Isomo ku rugendo rwanjye!!
Njye mvuga ko imyitwarire yanjye ariyo ingejeje aha. Ese wowe waje i Kigali ute?

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO