Uyu munsi Cecile Kayirebwa yujuje imyaka 75 - Ibiteye Amatsiko ku buzima bwe!!

Umuririmbyi, umusizi, umubyinnyi, n’umwanditsi w’indirimbo…uyu ni umwe mu bahanzi b’ibirangirire kurusha abandi bose b’Abanyarwanda, uyu munsi yujuje imyaka 75 y’amavuko.

Cecile Kayirebwa, yavukiye i Kigali ku babyeyi nabo bari abanyenganzo, mu biganiro bitandukanye yatanze yavuze ko se yari umuririmbyi ukomeye wa chorale muri kiliziya ya Ste famille i Kigali.

Impano ye nawe ntiyatinze kuboneka kuva ari muto yiga amashuri, kugeza atangiye gusohora indirimbo ze za mbere.

Mu 1973 we n’umuryango we barahunze, ajya gutura mu Bubiligi aho byamufashije gukora muzika kurushaho no kuyimenyakanisha.

Kayirebwa afite umwihariko w’ijwi ryiza n’inganzo ikomeye mu Kinyarwanda cyimbitse.

Kuva mu myaka ya 1970 kugeza ubu, Kayirebwa yagiye aririmba wenyine cyangwa se ari kumwe n’abandi.

Indirimbo ze nka; Tarihinda, None Twaza, Ndare, Ikizungerezi, Iwacu, Marebe cyangwa Mpore, ni indirimbo z’ikirenga zakunzwe cyane n’Abanyarwanda b’ingeri n’imyaka inyuranye, kugeza ubu.

Mumyaka irenga 40 ishize Kayirebwa yakoze ibitaramo byinshi anitabira amaserukiramuco akomeye mu bihugu bitandukanye cyane cyane muri Africa n’Iburayi, ndetse no mu Rwanda.

Yashinze ishyirahamwe ridaharanira inyungu yise CEKA I RWANDA avuga ko rigamije kubumbatira no gukundisha abandi umuco nyafurika mu mbyino, indirimbo n’ubuvanganzo.

Mu 2012 na 2013 yavuzwe cyane mu rubanza yarezemo ibigo by’itangazamakuru bitandukanye mu Rwanda – birimo n’ikigo cya leta cy’itangazamakuru – abishinja gukoresha ibihangano bye nta masezerano bafitanye.

Mu kwezi kwa munani yasohoye igitabo yise ‘Wowe utuma mpimba’ kirimo bimwe mu bisigo biri muri zimwe mu ndirimbo ze.

Kayirebwa, ni icyitegererezo ku bahanzi benshi mu Rwanda by’umwihariko ab’igitsina gore.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO