Yari inshuti y’urubyiruko! Inshamake ku buzima bwa Joseph Habineza witabye Imana ku myaka 57

Ku gicamunsi cy’uyu munsi tariki 20 Kanama nibwo inkuru mbi yatashye mu Banyarwanda ko uwahoze ari Minisitiri w’umuco na Siporo mu Rwanda, wari inshuti y’urubyiruko Joseph Habineza ‘Joe” yitabye Imana, aguye I Nairobi mu gihugu cya Kenya aho yari yaragiye kwivuriza.

Amakuru aturuka mu muryango wa Joseph Habineza avuga ko uyu mugabo yari yarabanje kwivuriza mu gihugu cya Nigeria ahasanzwe haba n’ibikorwa bye, ariko bikananirana akaza I Nairobi ari naho yaguye.

Benshi mu Banyarwanda ku mbuga nkoranyambaga bashegeshejwe cyane n’urupfu rwa Joseph Habineza.

Inshamake ku buzima bwa Joseph Habineza

Minisitiri Joseph Habineza yavukiye mu Ntara y’Amajyepfo mu cyahoze ari perefegitura ya Gitarama, mu Karere ka Kamonyi, mu mwaka w’I 1964.

Gusa ntabwo yakuriye muri aka karere kuko ababyeyi be bahise bajya kwiga hanze y’u Rwanda noneho bagarutse bahita bakorera i Kigali mu Kiyovu kuri EPR ari naho bahise batura, icyo gihe akaba yari afite imyaka hagati y’itatu n’ine.

Amashuri abanza ya mbere, imyaka itanu ya mbere yayize ku ishuri ribanza rya EPA riherereye ku Gitega ugana i Nyamirambo, Umwaka wa gatandatu ubanza awurangiriza kuri Ste Famille.

Amashuri y’isumbuye ikiciro rusange yayatangiriye i Rubengera ku Kibuye muri Mabanza ubu ni akarere ka Karongi. Yaje gukomereza mu Byimana, nyuma gato aza kuhava yiga St Fidele ku Gisenyi, yari Institut Superieur d’Informatique et de gestion (Ikoranabuhanga n’icungamutungo), ari naho yanamenyaniye na madamu we dore ko biganaga kuri iki kigo. Aha yaje kuhava akomereza kaminuza ahitwa i Montpellier mu Bufaransa aho yarangirije mu mpera za1989.

Arangije,Bralirwa yahise imuha akazi nka Analyste Programmeur (Mu by’ikoranabuhanga; ICT), nyuma y’umwaka umwe aba chef wa Departement ya Informatique, ari nako kazi yakoze kuva icyo gihe kugeza mu 1994 ubwo Heineken yashatse ko za ‘systems za Informatique” zo muri Afrika zose zimera kimwe, ubwo uyu mushinga nawo awukoraho ariko mu gihe yari igiye gutangira nibwo mu Rwanda habaye Jenoside yakorewe Abatutsi, ndetse icyo gihe uyu mugabo wanabaga muri komite nyobozi ya federasiyo ya Volleyball ntiyari yorohewe n’Interahamwe.

Joseph Habineza n’ubwo yakoraga muri Bralirwa yakundaga cyane umukino wa Volley ball ndetse anawukina byo ku rwego rushimishije ariko aza kugira ibibazo byo mu mavi ahitamo guhagarika gukina uyu mukino ariko ashyirwa muri komite nyobozi ya Federasiyo y’uyu mukino mu Rwanda.

Muri Mutarama 1994 yaje gufata abakinnyi maze atumiza abakinnyi bo mu Nkotanyi kuza gukina Volleyball nabo bagenzi babo umukino wabereye kuri stade regional i Nyamirambo, umunsi ukurikiyeho bapanze ko haba undi mukino, aho kugirango ube interahamwe ziramutera mu rugo iwe, baramumenesha Kacyiru bituma yimuka aba muri Milles Colline igihe gitoya, abana abohereza i Goma n’umugore we dore ko uyu mugore we ari naho yari asanzwe akomoka.

Mu gihe cya Jenoside yakorewe Abatutsi 1994 yaje guhita ava mu Rwanda asanga umuryango we I Goma, ahageze yasanze Heineken yavuze ko izahita imwohereza i Kinshassa agasigayo umuryango we maze we agahita ajya gukorera mu Bubiligi no mu Buholande. Aka kazi yagakoze mu gihe kingana n’amezi abiri n’atatu maze agaruka i Kinshassa gufata umuryango we bagaruka mu Rwanda nyuma ya Jenoside yakorewe Abatutsi, aho yahise asubira gukorera Bralirwa ariko icyo gihe hakaba nta bikorwa byari bihari bifatika.

Kubera wa mushinga yari yatangiye gukora, yaje gusabwa na Heineken ko yajya i Kinshasa gukorayo noneho agakurikirana ishyirwa mu bikorwa ry’uwo mushinga, Ubwo niho yakoze umwaka w’1995 n’igice kimwe cy’1996. Igihe u Rwanda rwari rutangiye kugirana ibibazo na Kongo aragaruka akorera mu Rwanda ariko icyo gihe akora n’i Burundi.

Mu 1998 Heineken yamwohereje muri Nigeria, kujya gukora muri Heineken yo muri iki gihugu, aho yagiye agomba kumara umwaka umwe ariko agezeyo abayobozi baho baramukunda, basanga ashoboye akazi bituma amarayo imyaka itandatu aho yajyaga anakira amakipe yo mu Rwanda yabaga yagiye gukinira muri Nigeria.

Mu 2004 nibwo yagarutse mu Rwanda, maze Perezida wa Repubulika Paul Kagame amugirira ikizere cyo kuyobora minisiteri y’Umuco na Siporo yamaze imyaka hafi 7 maze mu 2011 afata icyemezo cyo kwegura ku bushake bwe muru iyi minisiteri.

Icyo gihe nk’uko uyu mugabo yabisobanuriye abanyamakuru mu kiganiro bagiranye nyuma gato yo kwegura yavuze ko impamvu yafashe uwo mwanzuro ari ukubera kwanga guhesha isura mbi Leta y’u Rwanda, aha agahenge abashakaga kurwanya no gusebya Leta y’u Rwanda bamugendeyeho bamukoza isoni nka minisitiri bifashishije amagambo mabi asebanya aherekeje amafoto bari bashyize ku mbuga za internet; muri icyo gihe bari bakuye muri bimwe mu birori bwite yari yitabiriye maze agafata umwanya wo kwidagadurana nabo yari yasanzemo.

Joseph Habineza akazi ka mbere yakoze kari ako kubarura imodoka Habineza yagakoze muri BNEP, Bureau National d’ Etudes de la Projet, ikigo cyari gishinzwe kwagura imihanda, icyo gihe bashakaga kumenya umubare w’ imodoka zigendaga muri Kigali.

Habineza wigaga mu mashuri yisumbuye yicaraga hafi ya Rond Point nini yo mu mujyi wa Kigali uko imodoka itambutse agaca agakato nk’ ubarura amajwi saa kumi n’ imwe agataha, bwacya mu gitondo agaca ku biro akabereka umubare w’ imodoka yabaze ejo, agasubira ku kazi bityo bityo.

Mu mirimo y’ingenzi yakoze mu buzima bwe harimo kuba tariki 21 Ukuboza 1989-1991 yari Analyst Programmer muri Brarirwa, 1991-1994 yakuriye ishami rishinzwe ikoranabuhanga muri Blarirwa. Mutarama 1994: Vice President wa FRVB, Gicurasi 1994-1998: yakoreraga Heineken i Kinshasa.

Nzeri 1998- Nzeri 2004: Umuyobozi ushinzwe ikoranabuhanga muri Heineken muri Nigeria, Nzeri 2004- Gashyantare 2011- Minisitiri wa Siporo n’Umuco, Kanama 2011-Nyakanga 2014- Ambasaderi w’u Rwanda muri Nigeria, Nyakanga 2014 yagizwe Minisitiri wa Siporo n’Umuco amara kuri uwo mwanya iminsi 183 kuko yasimbujwe ku wa 24 Gashyantare 2015.

Muri Gicurasi 2019 nibwo Amb. Joe Habineza yabaye umuyobozi mukuru wa Radiant, akijyaho yahise atangira gutera inkunga ibitaramo by’abahanzi birimo na Iwacu na Muzika.

Joseph Habineza igihe cye cyo kuruhuka yakundaga kurangwa no kuba yishimye aganira n’abantu, atebya bagaseka, kujya ahantu abantu bicaye bakaganira, kureba imipira kuri Televiziyo cyangwa akajya kuwureba Live, ariko akenshi akabanza gukora sports ye ku giti cye.

Imana imuhe iruhuko ridashira

Yahoranaga Akanyamuneza ku Maso
Joe yari inshuti y’urubyiruko

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO