Young Grace yasohoye indirimbo yakoreye Dubai ati “Ntabwo biba byoroshye ni ukwigomwa”

Umuhanzikazi Abayizera Marie Grace wamenyekanye mu njyana ya Hip Hop nka Young Grace yashize yanze indirimbo ye nshya yise “Zip it” yakoreye Dubai ahishura ukuntu kuhakorera indirimbo ari ibintu bitoroshye na gato.

Uyu muraperikazi utunganyirizwa amashusho na musaza we King Philosophe berekeje ku mugabane w’Aziya muri Leta Zunze ubumwe z’Abarabu ahazwi nka Dubai bagiye guhurira n’umuvandimwe wabo ’Queen Edwige’ mu rwego rwo kuruhuka ariko bagezeyo babona ko batahava nta ndirimbo bahakoreye.

Ati "Twabonye ubwiza bwaho biba ngombwa ko tugomba kuhava tuhafatiye amwe mu mashusho y’indirimbo zanjye zizajya kuri Album ndi gutegura."

Mu kiganiro na Genesisbizz Young Grace yadutangarije byinshi kuri uru rugendo bagiriye I Dubai we n’abavandimwe .

Yagize ati "Twagiye i Dubai ku gitekerezo cyanjye, kuko ari umujyi nkunda cyane ubwo nahageraga rero nasanze ndamutse nsubiye mu Rwanda nta gikorwa cyijyanye na muzika mpakoreye naba narakoze ubusa niho rero twahise dufata umwanzuro wo kuhafatira amashusho ya zimwe mu ndirimbo zanjye harimo niyo nashyize hanze yitwa “Zip it” , ariko hakaba hari n’izindi nyinshi nahakoreye nzagenda ngeza ku bakunzi banjye mu minsi iri imbere."

Tumubajije ku kintu cyaba cyaramugoye cyane akigera muri kiriya gihugu yasubije ko atari byinshi cyane gusa ikintu atazibagirwa ni uko ari ahantu hashyuha cyane kandi akaba atari abimenyereye naho ubundi nta kindi kintu cyamugoye, yarahakunze cyane ni ahantu ho gutemberera kubera ko bafite ibintu byinshi kandi byiza.

Abajijwe ku bijyanye niba I Dubai bitarabahenze cyane kuhafatira amashusho yadusubije ko rwose atari ibintu byoroshye na gato kuko ni umujyi w’ubucuruzi, akantu kose kaho aba ari amafaranga bisobanuye ko imishinga yose yahakoreye yamuhenze n’ubwo yagize ibanga umubare w’amafaranga yaba yarakoresheje ubwo yari ariyo.

Yashimangiye ko aba ari ibintu bitoroshye gukorera amashusho ahantu hatari iwanyu kandi ngo no mu Rwanda burya ntabwo biba byoroshye.

Indirimbo Zip it yatunganyijwe mu buryo bw’amajwi na Producer Evydecks, amashusho atunganywa na musaza we King Philosophe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO