Yvan Buravan yasohoye indirimbo yakoreye Dj Miller-Video

Umuhanzi Yvan Buravan umenyerewe mu ijwi rihogoza yafatanyije n’umukobwa witwa Rachel Uwineza baririmbana indirimbo yibutsa Dj Miller nubwo atakiriho ko bazahora bamwibuka binyuze mu rukundo.

Iyi ndirimbo ifite iminota itatu irenga, iririmbyemo amagambo yiganjemo ari mu rurimi rw’icyongereza, aho Buravan aba agaruka ku kuba n’abasigaye ku isi hababanye hanini.

Muri iyi ndirimbo yitwa ‘Through Love’ bishatse kuvuga ko bizaca mu Rukundo, igizwe n’amagambo agira ati: “natwe hano hatubanye hanini… turi kugerageza gukomeza…ariko biragoye… blague zawe, care zawe… umurage wawe uzabaho iteka… binyuze mu rukundo tuzahorana, binyuze mu rukundo tuzagumana…”

Iyi ndirimbo igiye hanze nyuma y’aho Dj Miller ashyinguwe n’abatari benshi cyane bitewe n’ibihe byo kwirinda virusi ya COVID-19 ihangayikishije isi kuri ubu.

Karuranga Virgile wamenyekanye nka DJ Miller yitabye imana ku cyumweru tariki 5 Mata 2020 azize uburwayi, nyuma y’iminsi mike ashyizwe mu bitaro by’Umwami Faisal nyuma yo kugaragaza ibimenyetso by’indwara ya ‘Stroke’.

Ni umwe mu bavanga imiziki wari umaze kwandika izina rikomeye aho yanakoranaga n’abahanzi b’ingeri zose mu ndirimbo zitandukanye. Yakoranye na Butera Knowless, Dream Boys na Riderman indirimbo yitwa “Iri Joro ni Bae”.

Yakoranye kandi na Social Mulla mu ndirimbo yitwa Stamina, Un Million c’est Quoi na Peace ndetse na Belle yahuriyemo na Peace na Urban Boys.

Mu mwaka ushize yari yashyingiranywe na Hope Nigihozo ndetse mu Ukuboza bibaruka imfura y’umukobwa bise “Shani”.

Dore amashusho y’indirimbo nshya Yvan Buravan na Rachel Uwineza bahimbiye Dj Miller:

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO