Zimwe muri Filime wareba zivuga kuri Jenoside yakorewe Abatutsi 1994

Nyuma ya Jenoside yakorewe abatutsi, abahanzi banyuranye ba filime baba Abanyarwanda ndetse n’abanyamahanga bagiye bakoresha ubuhanzi bwa sinema mu kwereka isi amateka y’ibyabaye mu Rwanda mu gihe cya Jenoside yakorewe abatutsi mu 1994.

Buri mwaka tariki 07 Mata abanyarwanda batangira icyumweru cy’icyunamo n’iminsi 100 yo kwibuka Jenoside yakorewe Abatutsi mu 1994.

Ni ibihe bikomeye aho benshi bibuka inzira y’umusaraba baciyemo, amashusho y’uko ababo bishwe yongera kubagaruka mu maso nk’aho byabaye ejo, intimba n’agahinda biriyongera ku batazi aho ababo baguye.

Muri ibi bihe byo kwibuka Jenoside yakorewe Abatutsi hari filime zigaragaza amateka yayo ushobora kureba zikagufasha.

Trees of Peace

‘Trees of Peace’ ni filimi y’Umunyamerikakazi witwa Alanna Brown. Yagiye hanze muri uyu mwaka wa 2021.

Ifite inkuru ivuga kuri Jenoside yakorewe Abatutsi mu 1994 aho agaruka cyane ku buryo abagore bagiye bagira ubutwari mu gutabara no kugira abo barokora.

filime agaragazamo abagore bane baturuka mu bice binyuranye, bafite imyizerere inyuranye bahura nayo mu gihe cya Jenoside, bagafashanya kurokoka.

Muri icyo gihe bari gufashanya kurokorana, bamara iminsi 81 bihishe mu kumba kamwe.

Abakinnyi b’ingenzi bari muri iyi filime harimo “Eliane Umuhire, Charmaine Bingwa, Ella Cannon, Bola Koleosho na Tongayi Chirisa.”

Notre Damme Du Nil

Iyi ni filime ishingiye ku gitabo cy’umwanditsi Scholastique Mukasonga, yakozwe n’umufaransa ukomoka muri Afghanistan witwa Atiq Rahimi.
Notre Damme Du Nil yasohotse mu 2019, ivuga ku ishuri ryayoborwaga n’abihaye Imana mu myaka yo mu 1970.

Muri iki kigo higagamo abana b’abakobwa gusa biganjemo abakomokaga mu miryango y’abategetsi n’abacuruzi bakomeye.

Umwe mu bana w’umuyobozi ukomeye wo mu bwoko bw’Abahutu, abiba urwango mu bandi abangisha abo mu bwoko bw’Abatutsi bikagera n’aho bahohoterwa ndetse bamwe bakanicwa.

Igaragaramo Amanda Mugabekazi, Malaika Uwamahoro, Albina Sydney Kirenga na Clariella Bizimana na Belinda Rubango Simbi.

Long Coat

Ni filime ya Bamporiki Edouard unakinamo nk’umukinnyi w’Imena. Igaragaramo kandi umuhanzikazi Nirere Shanel, Mani Martin, Jimmy Gatete wahoze ari umukinnyi w’umupira w’amaguru, n’abandi.

Ivuga ku nkuru y’umwana w’umusore uvuka ku mubyeyi wakoze Jenoside yakorewe Abatutsi uba inshuti n’umukobwa wiciwe ababyeyi.

Haba se uba ufungiye ibyaha yakoze muri Jenoside na nyina uba yarasigaye ntabwo bishimira ko yifatanya n’abarokotse Jenoside mu bikorwa byo kwibuka.

Impamvu yiswe “Long Coat” ni ikote rirerire umubyeyi w’uyu musore aba yarahise mu rusenge mu rwego rwo guhisha ibimenyetso bw’ibyaha yakoze muri Jenoside.

Sometimes In April

Iyi filime nayo yasohotse mu 2005, ikinwa mu rurimi rw’Icyongereza n’Ikinyarwanda. “Sometimes In April” igaragaramo abakinnyi nka Idris Elba wamamaye muri filime za Hollywood, umunyarwandakazi Carole Karemera, Debra Winger na Oris Erhuero.

Iyi filime ivuga ku mugabo wo bwoko bw’Abahutu uba warashakanye n’umugore wo mu bwoko bw ‘Abatutsi akarwana no mu kumurokora we n’abana be mu gihe cya Jenoside na mbere yayo.

Munyurangabo

Iyi ni filime yasohotse mu 2009. Yayobowe n’umunya-Koreya witwa Lee Isaac Chung. Ivuga ku bana babiri b’abahungu bahurira mu Mujyi wa Kigali, umwe yitwa Sangwa undi ni Munyurangabo.

Nyuma yo kwiba umuhoro mu isoko biyemeza kujya mu cyaro ngo bajye kwihorera ku bishe umuryango wa Munyurangabo, ariko bakabanza guca iwabo wa Sangwa aho yari amaze imyaka itatu atahagera.

N’ubwo baba bafite gahunda yo guhita bakomeza, bamara iminsi iwabo wa Sangwa aho se atishimira ubushuti bwabo kuko Munyurangabo ari uwo mu bwoko bw’Abatutsi.

Iyi filime igaragaramo Edouard Bamporiki kuri ubu wabaye Umunyambanga wa Leta muri Minisiteri y’Urubyiruko n’Umuco.

Urambikire Ibanga

Urambikire Ibanga’ ni fiime yakozwe na Aimable Kubana mu 2019.

ishingiye ku nkuru mpamo y’umukobwa wari inshuti na Aimable Kubana, biganye kuva mu mashuri abanza kugera mu cyiciro rusange cy’amashuri yisumbuye ari naho Jenoside yasanze bari.

Uyu mukobwa witwaga Umwali Claire yatemaguwe n’Interahamwe zinamufata ku ngufu, nyuma ajya muri Saint Paul yarangiritse ku buryo n’abari bamuzi batabashaga kumumenya.

Baje guhura baribwirana amutekerereza ibyamubayeho byose ariko amusaba kutabibwira umusore witwaga Claude bakundanaga ari naho havuze izina rya filime ‘Urambikire Ibanga.’

Uyu musore yaje kwicwa mu gitero cyahitanye abandi bagera kuri 60 bari bihishe muri Saint Paul, naho Umwali Claire yitaba Imana nyuma ya Jenoside yishwe na virusi itera Sida yatewe n’Interahamwe.

Kinyarwanda

Iyi filime yasohotse mu 2011 iyoborwa na Alrick Brown. Igaragaramo Bamporiki Edouard, Mazimpaka Kennedy, n’abandi batandukanye.

Ivuga uburyo ubwo Jenoside yakorewe Abatutsi yatangiraga, Umuyobozi w’Idini ya Islamu mu Rwanda yatanze itegeko ribuza abayoboke b’iri dini kwishora mu bwicanyi.

Mu gihe ahantu hose hari huzuye imivu y’amaraso, imisigiti yabaye ubuhunguro bw’Abatutsi n’Abahutu bari banze kwishora mu bwicanyi. Kinyarwanda ishingiye ku nkuru mpamo z’abahungiye mu ku mugisiti mukuru wo Mujyi wa Kigali n’imigisiti mito yo muri Nyanza. Iyi filime ihuriza hamwe inkuru eshashatu zitandukanye zigatanga ishusho nyanyo y’ubuzima bwo muri Jenoside yakorewe Abatutsi.

100 Days

Iyi filime yayobowe na Nick Hughes ayikora afatanyije na Eric Kabera mu 2001. Ni yo filime ya mbere yakozwe ivuga kuri Jenoside yakorewe Abatutsi mu 1994.

Iri zina ryayo “100 Days”risobanura iminsi 100 Jenoside yakorewe Abatutsi yamaze, ikagaragaza ibyayiranze.

Muri iyi filime hagaragaramo inkuru y’umukobwa ujya gushakira ubuhungiro mu kiliziya agafatwa ku ngufu n’umupadiri ndetse akamutera inda, nyuma yo kubyara umwana akamuta.

Shooting Dogs

Iyi ni filime yasohotse mu 2005, yayobowe na Michael Caton-Jones, ikaba ishingiye ku buhamya bw’uwari umunyamakuru wa BBC David Belton wari mu Rwanda mu gihe cya Jenoside yakorewe Abatutsi mu 1994.

Iyi filime ivuga ku byabereye mu ishuri ryahoze ryitwa ETO Kicukiro ubu ni IPRC Kigali, ahari hakambitse ingabo z’Umuryango w’Abibumbye.

Abatutsi amagana bahungiye muri iki kigo bizeye ubutabazi ariko bagezeyo aba basirikare bahambira ibyabo barataha babasiga mu maboko y’abacanyi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO